585 տարի առաջ՝ 1431 թվականի հունվարի 1-ին, Վալենսիայում ծնվեց Հռոմի Պապ Ալեքսանդր 6-րդը, նույն ինքը՝ Ռոդրիգո Բորջիան, որին հիշում են որպես անբարոյականության, անթիվ ինտրիգների եւ թունավորումների խորհրդանիշ: Ներկայացնում ենք նրա կենսագրությունից մի քանի հետաքրքիր փաստ:

Հռոմի Պապի թալիսմանը

Պատմաբանները վստահեցնում են, որ Ալեքսանդր 6-րդը յուրօրինակ թալիսման ուներ, որի հետ են կապում նրա ճակատագիրը: Կարդինալ լինելու տարիներին նրան այդ թալիսմանը նվիրվել էր մի գնչուհի՝ ասելով, որ նա չի մեռնի այնքան ժամանակ, քանի դեռ կրում է այն պարանոցին: Տարօրինակ փաստ է, բայց Պապն իր մահվան օրը տարված էր հյուրերին թունավորելու մտքերով եւ մոռացել էր կապել այն:

Բազմազավակ հայր

Որոշ տվյալների համաձայն՝ Ռոդրիգո Բորջիան  8 կամ 9 երեխա ուներ տարբեր կանանցից: Պոնտիֆիկոսի կենսագիրները դրանց բաժանում են 2 խմբի՝ նրանք, ովքեր ծնվել են նախքան նրա՝ որպես լեգատ Իսպանիա մեկնելը, եւ նրանք, ովքեր ծնվել են Հռոմի Պապ դառնալուց հետո:

«Անառակության հրեշ»

Ալեքսանդր 6-րդը հայտնի է իր բազմաթիվ սիրավեպերով: Բայց ամենալուրջ սկանդալը կապված է դստեր՝ Լուկրեցիայի հետ սեռական կապ ունենալու հետ: Ժամանակակից պատմաբանները կարծում են, որ Լուկրեցիան անամոթ կուրտիզանուհի չէր, եւ ինցեստի մասին շշուկները կարող էին ուղղակի «սեւ փիառ» լինել:

Հայտնի թունավորող

Պապ լինելու 11 տարիներին Ալեքսանդր 6-ի հրամանով սպանել են 27 կարդինալի:

Շշուկների համաձայն՝ Բորջիան 2 պարզ եւ հեշտ միջոց էր հնարել թշնամիներից ազատվելու համար՝ ձեռքսեղմում եւ զարդատուփերի կողպեք: Հռոմի Պապը աջ ձեռքի մատին մատանի էր կրում եւ ձեռքսեղմման պահին դրանից սույր ծայր էր խրվում դիմացինի ձեռքը եւ թույն ներարկում: Նույն մեխանիզմը գործում էր նաեւ զարդատուփերը բացելիս:

Ինդուլգենցիաների վաճառք

Երբ Ալեքսանդրը Հռոմի Պապ դարձավ, գանձարանը դատարկ էր, եւ Սուրբ աթոռի պարտքերը կազմում էին առնվազն 120 000 դուկատ: Իսկ իր մահից հետո Ալեքսանդրը մեծ թվով կանխիկ գումար թողեց, որը կուտակել էր ինդուլգենցիաների վաճառքի հաշվին: Ինդուլգենցիաների վաճառքի հայեցակարգը՝ մեղքերի ամբողջական կամ մասնակի մարումը, ընդունվել էր դեռեւս 1343-ին: Դրանց վաճառքը համալրեց գանձարանը:

1501 թվականին Ալեքսանդրի որդի Չեզարեն Վատիկանի իր պալատում Բոլոր սրբերի օրվա կապակցությամբ շքեղ տոն էր կազմակերպել: Հետաքրքիր է, որ այս միջադեպը նկարագրել են թե՛ պապի հակառակորդները, թե՛ նրան լոյալ տրամադրված անձինք: Իբր թե 50 հռոմեացի կուրտիզանուհի հրավիրված էին այդ ընթրիքին եւ մերկ պարում էին սպասավորների հետ:

Սխալմամբ վրա հասած մահ

Հռոմի Պապի մահը զարմանալի էր: Վարկածներից մեկի համաձայն՝ նա մահացել է անհեթեթ պատահականությամբ: 1503 թվականի օգոստոսին նա իր որդի Չեզարեի հետ հյուրերի էր կանչել ընթրիքի՝ թունավորելու: Աղանդերի ժամանակ պետք է գինի մատուցեին, որի՝ հյուրերի համար նախատեսված բաժնի մեջ թույն էր լցված: Սակայն Պապն ու Չեզարեն նախքան աղանդերը մատուցելը խոհարարից գինի էին խնդրել, իսկ վերջինս շփոթել էր շշերը: Ալեքսանդրն ու Չեզարեն իրենց վատ էին զգացել եւ հոգեվարքի մեջ ընկել: Հռոմի Պապը մահացել էր, իսկ Չեզարեին հաջողվել էր փրկել: Մեկ այլ վարկածի համաձայն՝ Պապին թունավորել էր Չեզարեն, կամ էլ պոնտիֆիկոսը մահացել էր սովորական մրսածության հետեւանքով: