Դերասանուհի Գայանե Ասլամազյանի նախկին ամուսինը՝ Վարդգես Մարկոսյանը, եւ վերջինիս քույրը՝ Իռեն մարկոսյանը, ԱՄՆ-ում մեղադրվում են թմրամիջոցների ապօրինի շրջանառության եւ փողերի լվացման համար: Ամուսնալուծության ու նախկին ամուսնու՝ կալանավայրում գտնվելու մասին սոցցանցերում հայտնել էր դերասանուհին, իսկ մանրամասները հայտնի են դառնում ԱՄՆ արդարադատության դեպարտամենտի կայքից, որում հրապարակումն արվել է դեռ այս տարվա սեպտեմբերի 13-ին:

Ըստ ԱՄՆ արդարադատության դեպարտամենտի՝ Վարդգես Մարկոսյանը խստովանել է, որ 2014թ. դեկտեմբերից 2016թ. հոկտեմբերը 40կգ կոկաին է տեղափոխել: Ուղարկել է Ավստրալիա՝ թաքցնելով կենցաղային իրերի, օրինակ, գազի կաթսաների, օդորակիչների մեջ: Նա նաեւ խոստովանել է. որ փողերի լվացման հարցում իր հանցակիցն է եղել քույրը: Նրանք դա արել են 2014թ. մայիսից մինչեւ 2019թ. հունվարը: Խոսքը 3.5մլն դոլարի մասին է:

Նշվում է, որ երկուսն էլ ընդունել են մեղադրանքները՝ թե Իռեն Մարկոսյանը, եւ թե Վարդգես Մարկոսյանը, որը հայտնի է նաեւ «Ջիանի Օնչո», «Դեւիդ Պետրոսով», «Լարամ Նարման» անուններով: Նրանք համաձայնել են որպես փոխհատուցում մի քանի հարյուր հազար դոլարի հասնող գումար ու անշարժ գույք հանձնել ԱՄՆ կառավարությանը: Նշվում է, որ Վարդգես Մարկոսյանին սպասվում է 10 տարուց մինչեւ ցմահ, նրա քրոջը՝ որպես հանցակից՝ մինչեւ 20 տարվա ազատազրկում

armtimes.com