Չինաստանում դատարանը այսօր վճռեց 13,5 տարվա ազատազրկման դատապարտել Ինտերպոլի նախկին ղեկավար Մենգ Հոնգվեյին` նշանակելով նաև 290 հազար դոլարի տուգանք: Դատարանն ապացուցված համարեց 2 միլիոն դոլար կաշառք ստանալու մեղադրանքը: Մենգ Հոնգվեյն ասել է, թե չի բողոքարկի դատավճիռը: Մենգ Հոնգվեյը Ինտերպոլի ղեկավար էր նշանակվել 2016 թվականին: 2018-ի սեպտեմբերին նա ճամփորդել էր Չինաստան, որտեղ անհետացել էր: Ավելի ուշ Չինաստանի իշխանությունները հայտնել էին, որ Հոնգվեյը ձերբակալվել է կոռուպցիոն մեղադրանքով: Նախկինում, մինչ Ինտերպոլը գլխավորելը, նա Չինաստանի Հանրային անվտանգության նախարարի տեղակալն էր: Չինաստանի կոմունիստական կուսակցությունն անցած տարի հայտարարել էր, թե Մենգ Հոնգվեյը վատնել է պետական միջոցները, չարաշահել լիազորությունները, չի կատարել կուսակցության որոշումները: Մենգ Հոնգվեյի կինն անցյալ տարի քաղաքական ապաստան է ստացել Ֆրանսիայում: Նա պնդում է, որ իր ամուսնու նկատմամբ քրեական հետապնդումը քաղաքական բնույթ է կրում:

azatutyun.am