Արցախի Հանրապետության նախագահ Արայիկ Հարությունյանն իր ֆեյսբուքյան էջում շնորհավորական ուղերձ է հղել շրջանավարտներին․ 

«Սիրելի ՛ շրջանավարտներ 

Աշխարհին պատուհասած համավարակը, ցավոք, այս տարի բոլորիս զրկել է «Վերջին զանգի» տոնական միջոցառման կազմակերպումից: Համոզված եմ, սակայն, որ իրավիճակի հետևանքով առաջացած հիասթափությունը որևէ կերպ չի խանգարելու, որ ձեզանից յուրաքանչյուրն իր առջև դրված նպատակներին հասնելու համար անհրաժեշտ ջանքեր գործադրի: Մի՛ մոռացեք, որ ցանկացած ճգնաժամ նաև հնարավորություն է: 

Դպրոցն ավարտելուց հետո ձեր կյանքում սկսվում է շատ կարևոր մի շրջափուլ, որտեղ որակի ու արդյունավետության չափման միավորները կրկին գիտելիքների մակարդակն ու ցուցաբերած հմտություններն են լինելու: Ուստի, ինչ մասնագիտություն էլ կյանքում ընտրելու լինեք, միշտ հիշե՛ք, որ ձեր ոլորտում պետք է լինեք առաջատարը: 

Մեր նախընտրական խոստման համաձայն՝ սեպտեմբերի 1-ից Արցախում բարձրագույն կրթությունը կդառնա անվճար: Սակայն մեկ անգամ ևս հաստատում եմ, որ կրթության որակի նկատմամբ խիստ են լինելու նաև պետության պահանջները: Հետևապես, սովորելու և անընդհատ կատարելագործվելու ցանկությունը թող երբեք չլքի ձեզ: 

Սիրելի՛ շրջանավարտներ 

«Վերջին զանգի» առթիվ շնորհավորում եմ ձեզ և ձեր ուսուցիչներին՝ մաղթելով, որ իրականանան ձեր բոլոր երազանքներն ու մտահղացումները՝ հանուն ձեր անհատական և բոլորիս հավաքական հաջողությունների: Բարի՜ երթ»: 

https://www.facebook.com/ArayikHarutyunian/photos/a.177887032908678/533612034002841/?type=3&__xts__%5B0%5D=68.ARBn94WPjSQHgHdgev2-cKW1Yz4zKNxxCY6-rq3ORfQ7i-6PJofnWmg4YmQN_NG5BicKF2scn6OzkhHWs_3mPHXbd1u5x_fFWOYEF_CcVKSoponYlvFUylJWk710w5a6FcK4iaGcVKdEx7Ru3b_aABhy1oGPifa0JowUYqhmRq2pjb4fQ6tLS7Vu6k_Dgux_CNeIsYfqojZCbtwqdC-ZTgEBsB8O6gZ2gB_UG-5_DUYoG6uwvgaFK2bOHHXLZn522zEcoX3k9JkeCVEmxncuE-xsDZpyYW7sKyWiV7i7t8tvsR50TFZCqFpg9Kca1tDxPPEkaePuN6KJ3QAT6X4sNLE&__tn__=-R