Azatutyun24
Հայաստանում գործարկված ցիկլատրոն տեսակի արագացուցչի հնարավորությունն օգտագործելով՝ մասնագետները շուտով կարող են ընդունել առաջին հիվանդներին: Այն հնարավորություն է տալու բարձր ճշգրտությամբ ախտորոշել ուռուցքային հիվանդությունները: Արագացուցիչը գործարկվել է շուրջ մեկ տարի առաջ, սակայն հիվանդներին ընդունելու համար դեռ որոշ փուլեր պետք էր անցնել:
«Արմենպրես»-ի մամուլի սրահում հրավիրված ասուլիսում Ա. Ի. Ալիխանյանի անվան ազգային գիտական լաբորատորիայի տնօրեն Անի Ապրահամյանը նշեց, որ համավարակով պայմանավորված՝ ցիկլատրոն տեսակի արագացուցիչի հետ կապված ծրագրերը փոքր-ինչ հետաձգվեցին: «Նախատեսված էր, որ արդեն այս տարվա ապրիլի սկզբից առաջին հիվանդներին հնարավոր կլինել ըդնունել, սակայն համավարակով պայմանավորված ծրագրերը փոխվեցին: Այժմ նախապատրաստվում ենք, որ մոտավորապես մեկ ամսից հետո կարողանանք առաջին հիվանդներին ընդունել»,-ասաց Անի Ապրահամյանը:
Լաբորատորիայի տնօրենը նշեց, որ Հայաստանի համար շատ կարևոր ծրագիր է, այն վաղուց պետք է իրականացվեր: Արագացուցիչն արտադրում է իզոտոպներ, որոնք մի քանի փուլ անցնելով դառնում են նյութ՝ հիվանդին ներարկելու համար։ Այդ ներարկումն անհրաժեշտ է «Պետսկան» հետազոտություն անցնելու համար: Այս նոր սարքավորման օգնությամբ, քաղաքացիները ստիպված չեն լինի այդ հետազոտությունն անցնելու համար մեկնել այլ երկրներ: Այն հնարավոր է կատարել Հայաստանում և իրականացնել բարձր ճշգրտությամբ ախտորոշում:
Անի Ապրահամյանը նկատեց, որ ցիկլատրոնի գործարկման գործում մեծ ներդրում են ունեցել Ա. Ի. Ալիխանյանի անվան ազգային գիտական լաբորատորիայի երիտասարդ ինժեներները: Նա տեղեկացրեց, որ առաջին հիվանդներին ընդունելը նախատեսվում է կատարել անվճար:
Անի Ապրահամյանը նշեց, որ այս հնարավորությունը նախատեսված է օգտագործել առողջապահական զբոսաշրջության ոլորտում: Արդեն Վրաստանից կա հետաքրքրություն Հայաստանից իզոտոպներ ձեռբերելու հարցում:
