ՀՀ հանրային ծառայությունները կարգավորող հանձնաժողովը հուլիսի 29-ի նիստում կքննարկի  «ՎԵՈՆ Արմենիա» («Բիլայն» ապրանքանիշ) փակ բաժնետիրական ընկերության կանոնադրական կապիտալի 100 տոկոսը կազմող բաժնետոմսերը գրավադրելուն համաձայնություն տալու մասին։

«Արմենպրես»-ի հաղորդմամբ՝ հանձնաժողովի համապատասխան որոշման նախագծով նախատեսվում է համաձայնություն տալ «ՎԵՈՆ Արմենիա»-ի կանոնադրական կապիտալի 100 տոկոսը կազմող բաժնետոմսերի նկատմամբ սեփականության իրավունքը «Թիմ» ՍՊԸ-ի կողմից ձեռք բերելուց հետո վերջինիս կողմից «Արդշինբանկ» փակ բաժնետիրական ընկերության օգտին գրավադրելուն։ Որոշումը հիմնավորվում է նրանով, որ «ՎԵՈՆ Արմենիա»-ի կողմից հանձնաժողովին հղված հուլիսի 16-ի N204/20-И11 գրությունրում նշվել է, որ «Վիմպել-Կոմունիկացիի» հանրային բաժնետիրական ընկերության («ՎԵՈՆ Արմենիա»-ի սեփականատեր) և «Թիմ» ՍՊԸ-ի միջև բաժնետոմսերի համաձայնեցված գնով առուվաճառքի գործարքի ֆինանսավորման աղբյուրը վարկային միջոցներն են, որի կապակցությամբ «Թիմ» ՍՊԸ-ի և «Արդշինբանկ» փակ բաժնետիրական ընկերության միջև պայմանավորվածություն է ձեռք բերվել, որ նշված միջոցները կտրամադրվեն բանկի կողմից, և վերջիններիս միջև կնքված վարկային պայմանագրով դրանք վերադարձնելու «Թիմ» ՍՊԸ-ի պարտավորությունների կատարումն ապահովված կլինի՝ Ընկերության բաժնետոմսերի գրավով, որի կապակցությամբ «ՎԵՈՆ Արմենիա»-ն խնդրել է իր բաժնետոմսերի սեփականության իրավունքը «Թիմ» ՍՊԸ-ին փոխանցելու գործարքի իրականացման նպատակով, համաձայնութուն տալ նշված բաժնետոմսերը «Թիմ» ՍՊԸ-ի կողմից «Արդշինբանկ» փակ բաժնետիրական ընկերության օգտին գրավադրմանը։

ՀՀ հանրային ծառայությունները կարգավորող հանձնաժողովի հուլիսի 10-ի նիստում համաձայնություն է տվել «ՎԵՈՆ Արմենիա» ՓԲԸ-ի 100 տոկոս բաժնետոմսերը «Թիմ» սահմանափակ պատասխանատվությամբ ընկերությանն օտարելուն։