Սաուդյան Արաբիայի պաշտպանության նախարարությունը հայտարարել է, որ սաուդյան կործանիչները ուղեկցել են թագավորության օդային տարածքով անցնող B-52 ամերիկյան ռմբակոծիչներին, գրում է Al Masdar News-ը՝ նկատելով, որ սա Իրանի հետ տարածաշրջանայաին լարվածության ֆոնին՝ Թեհրանին ուղղված հզոր «մեսիջ» է: 

Պաշտպանության նախարարության պաշտոնական էջը Twitter-ում սաուդյան կործանիչների թռիչքից տեսանյութ է հրապարակել՝ նշելով, որ ԱՄՆ ՌՕՈՒ-ի երկու ռազմավարական ռմբակոծիչներ ամերիկյան ռազմակայանից ժամանել են Մերձավոր Արևելք։ 

ԱՄՆ-ի կենտրոնական հրամանատարությունն իր տարածած հաղորդագրության մեջ հաստատել է, որ երկու ռմբակոծիչներ վերջին երկու ամսվա ընթացքում իրենց պատասխանատվության գոտում թռչել են «տարածաշրջանային գործընկերների» ինքնաթիռների ուղեկցությամբ: 

Այդ կապակցությամբ The New York Times թերթը մեջբերել է Պենտագոնի պաշտոնատար անձանց խոսքերն այն մասին, որ երկու ռմբակոծիչները, որոնք կարող էին միջուկային ռումբեր կրել, հինգշաբթի լքել են Լուիզիանայի Բարքսդեյլ ավիաբազան և Մերձավոր Արևելքում առաքելություն են իրականացրել, իսկ հետո վերադարձել են իրենց բազա: 

Աղբյուրները պնդել են, որ «առաքելությունը տևել է 36 ժամ, որոնց ընթացքում երկու ռմբակոծիչներն անցել են Ատլանտյան օվկիանոսն ու Եվրոպան, այնուհետև անցել են Արաբական թերակղզու և Պարսից ծոցի վրայով, որտեղ շրջապտույտ են կատարել Կատարի մերձակայքում՝ Իրանի ափերից անվտանգ հեռավորություն պահպանելով»։ 

Պաշտոնական անձանց խոսքով՝ «առաքելությունը հստակ հաղորդագրություն էր Իրանին, որպեսզի վերջինս զերծ մնա ԱՄՆ-ի և տարածաշրջանում կոալիցիոն ուժերի դեմ ցանկացած ագրեսիվ գործողություններից»։

auroranews.am