Համայնքների վարչական տարածքներում անշարժ գույքի հասցեի տրամադրման ու վճարի սահմանման անհրաժեշտության մասին օրինագիծը քննարկվեց  փետրվարի 3-ի նիստում: ««Տեղական տուրքերի և վճարների մասին» ՀՀ օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթը քննարկեց ՀՀ ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովը Ղալումյան Վահեի նախագահությամբ:

ՀՀ հողային օրենսգրքում լրացում նախատեսող Կառավարության հեղինակած նախաձեռնությունը ներկայացրեց ՀՀ էկոնոմիկայի նախարարի տեղակալ Արման Խոջոյանը: Նպատակը չօգտագործվող գյուղատնտեսական նշանակության հողերի բացահայտման և տվյալների բազայի ստեղծման համար անհրաժեշտ օրենսդրական հիմքի ստեղծումն է:

Համաձայն ՀՀ 2019 թվականի հողային հաշվեկշռի և ՀՀ ազգային վիճակագրական ծառայության տվյալների՝ 444,8 հազար հա վարելահողերից 2019 թվականի հուլիսի 1-ի դրությամբ նպատակային չի օգտագործվել շուրջ 216,9 հազար հեկտարը կամ 48,8 %-ը:

Ըստ առաջարկվող փոփոխության՝ գյուղատնտեսական նշանակության հողերը որպես չօգտագործվող հողեր դասակարգելու չափանիշները և դրանց հաշվառման կարգը սահմանում է Կառավարությունը:

Երկրորդ ընթերցմամբ քննարկված օրենսդրական նախաձեռնություններն ստացան դրական եզրակացություն: