Azatutyun24
Եվրոպական խորհրդի նախագահի ներկայացուցչի միջնորդությամբ Վրաստանի իշխանության և ընդդիմության միջև մեկ շաբաթ շարունակվող երկխոսությունը երկրում քաղաքական ճգնաժամի լուծման վերաբերյալ ավարտվեց առանց արդյունքի՝ հայտնել է Interfax-ը:
«Վրաստանում քաղաքական ճգնաժամի լուծումը կախված է վրացի քաղաքական առաջնորդներից: Հուսով եմ, որ կուսակցությունները կխորհեն ստեղծված իրավիճակի մասին»,- ասել է Եվրոպական խորհրդի նախագահի ներկայացուցիչ Քրիստիան Դանիելսոնը:
Գրեթե ինը ժամ տևած բանակցություններից հետո ընդդիմադիր «Միացյալ ազգային շարժում» կուսակցության առաջնորդներից Ակակի Մինաշվիլին ասել է, որ երկխոսությունը խափանվել է իշխող «Վրացական երազանք» կուսակցության առաջնորդների մեղքով:
«Իշխող կուսակցության ներկայացուցիչները տապալեցին բանակցությունները՝ հրաժարվելով քննարկել նոր խորհրդարանական ընտրությունների նշանակման և քաղբանտարկյալների ազատ արձակման մեր հիմնական պահանջները»,- լրագրողներին ասաց Մինաշվիլին:
Նրա խոսքով՝ ընդդիմությունը լայնածավալ ցույցերով կպատասխանի իշխանությանը:
Իր հերթին, բանակցությունների մասնակից, իշխող «Վրացական երազանք» կուսակցության նախագահ Իրակլի Կոբախիձեն լրագրողներին ասել է, որ ընդդիմության նպատակն է ցանկացած ձևով խափանել համաձայնության ձեռքբերման գործընթացը:
«Ընդդիմության առաջարկները վերջնագիր էին` ուղղված օրենքի խախտմանը: Ակնհայտ դարձավ, որ ընդդիմությունը ցանկանում է խափանել բանակցությունները»,- ասել է Կոբախիձեն:
Այնուամենայնիվ, նա չի բացառել հետագա բանակցությունների հնարավորությունը՝ շեշտելով, որ իշխանություններն ընդդիմությանը օրենքի խախտում թույլ չեն տա:
Azatutyun24
