Azatutyun24
«Դեռեւս որեւէ նորություն չկա»։ Այս մասին մեզ հետ զրույցում ասաց Օձունի համայնքապետ Արսեն Տիտանյանն` անդրադառնալով Լոռու մարզպետի կողմից բռնության ենթարկվելու դեպքով հարուցված քրեական գործին։
Նա նաեւ նշեց, որ իրեն ոչ ոք չի կանչել որեւէ քննչական գործողության, տեղյակ էլ չէ` մարզպետը, նաեւ ծեծի ենթարկող մյուս մարզպետարանի աշխատակիցները հրավիրվե՞լ են, թե՞ ոչ, հարցաքննության։
Համայնքապետը նաեւ ասաց, որ իրեն ծեծի ենթարկողների դեմքերը հիշում է։
Դատաբժշկական փորձաքննության եզրակացությունը եւս պատրաստ է, Տիտանյանի փոխանցմամբ` այդ փորձաքննության արդյունքներով` արձանագրվել է լնդի հատվածում արյունահոսություն եւ գլխի շրջանում վնասվածք։
Հիշեցնենք, որ օրեր առաջ Օձունի համայնքապետն ահազանգել էր, որ Լոռու մարզպետը նախ պահանջել էր աշխատանքից ազատման դիմում գրել, ապա բացասական պատասխան ստանալուց հետո մարզպետն ու աշխատակիցները ծեծի էին ենթարկել գյուղապետին հենց մարզպետարանի շենքում: Գյուղապետը հաղորդում էր ներկայացրել ոստիկանություն, գործն ուղարկվել է ՀՔԾ:
«Հրապարակ օրաթերթ»
