Azatutyun24
Այսօր՝ հոկտեմբերի 19-ին, հրավիրվել է ԱԺ գիտության, կրթության, մշակույթի, սփյուռքի, երիտասարդության և սպորտի հարցերով ԱԺ մշտական հանձնաժողովի նիստ: Այժմ քննարկվում է «Զանգվածային լրատվության մասին» օրենքում փոփոխություններ կատարելու մասին օրենքի նախագիծը:
Արդարադատության նախարար Կարեն Անդրեասյանն ընդգծեց. «Այս նախագծում չկա որևէ ծանրաբեռնվածություն կամ իրավական բեռ, որը դրվելու է լրագրողների վրա՝ կապված անանուն աղբյուրների հետ: Մենք խնդիր ունենք, որ լրագրողները միշտ կարողանան օգտվել անանուն աղբյուրներից: Լրագրողը պարտավոր չէ բացահայտել անանուն աղբյուրը, բայց դա չի նշանակում, որ նա ազատվում է պատասխանատվությունից: Ամբողջ աշխարհի պրակտիկան այդպես է՝ լրագրող, դու կարող ես ունենալ անանուն աղբյուր, բայց այդ աղբյուրի համար պատասխան տալիս ես դու»:
Նա հիշատակեց Հայաստանում առկա երկու ֆեյք՝ «Անկախ Հայաստան» և «Ռեգինա Պրայզյան». «Եվ հիմա մարդուն անվանարկող ֆեյքերի տարածած հոդվածը վերցնում են մյուս լրատվամիջոցները և առանց որևէ ստուգման, առանց որևէ պատասխանատվություն կրելու հրապարակում են և ասում են, թե ազատ եմ պատասխանատվությունից, որովհետև աղբյուր եմ օգտագործել: Այս նախագիծն ասում է՝ եթե դուք հղում եք անում հայտնի աղբյուրի, ապա զրպարտության համար պատասխանատվություն չեք կրում, բայց եթե դուք օգտվել եք ֆեյքից, որպեսզի զրպարտեք մեկ ուրիշին, կրում եք պատասխանատվություն: Այս նախագիծը այն մասին է, որ ֆեյքին հղում տալով՝ լրատվամիջոցը պատասխանատվությունից չի խուսափելու»:
Azatutyun24
