Որոշ «լրատվամիջոցներ», իրար հերթ չտալով, մանիպուլացնում են Սահմանադրական դատարանի վերջին որոշումը, իսկ որոշ լրատվամիջոցներ՝ բարեխիղճ մոլորությամբ արտատպում նույն մանիպուլյացիան։ Այս մասին «Ֆեյսբուք»-ի իր էջում գրել է ՀՀ արդարադատության նախկին փոխնախարար Սուրեն Գրիգորյանը:

Գրառման մեջ նաև ասված է.

«Մինչդեռ Սահմանադրական դատարանի որոշման հրապարակված եզրափակիչ մասից (https://www.facebook.com/567973740326111/posts/1350709125385898/) հետևում է, որ

Սահմանադրական դատարանը, ըստ էության, ասել է միայն․

Առողջապահության նախարարը չի կարող ասել, թե ում հաշվին անձը պետք է իրականացնի ՊՇՌ թեստավորումը։ Կցանկանա իր հաշվին կիրականացնի, կցանկանա իր ընկերոջ, մորաքրոջ, եղբոր և այլն։

Սահմանադրական դատարանը չի ասել՝

որ ՊՇՌ թեստավորումը պետք է իրականացվի պետական բյուջեի կամ գործատուի կամ որևէ այլ սուբյեկտի հաշվին,

որ Առողջապահության նախարարի հրամանի որևէ այլ դրույթ հակասահմանադրական է․

Հետևաբար, ինչպես մինչև ՍԴ որոշումը, այնպես էլ դրանից հետո՝

պետք է կա՛մ պատվաստվել, կա՛մ պարբերաբար թեստավորվել։ Մի տրվեք մանիպուլյացիաների»։