Azatutyun24
ԱՄՆ-ն ակնկալում է, որ ՄԱԿ-ի Մարդու իրավունքների խորհրդում Ռուսաստանի աշխատանքը դադարեցնելու վերաբերյալ քվեարկությունը տեղի կունենա հինգշաբթի՝ ապրիլի 7-ին: Այդ մասին հայտարարել է ՄԱԿ-ում ԱՄՆ մշտական ներկայացուցիչ Լինդա Թոմաս-Գրինֆիլդը:
«Այդ հարցով պետք է զբաղվել Գլխավոր վեհաժողովում, և մենք ակնկալում ենք դրան հասնել հնարավորինս արագ՝ այս շաբաթ՝ հինգշաբթի»,- նշել է դիվանագետը:
ՄԱԿ-ում Ռուսաստանի ներկայացուցիչ Վասիլի Նեբենզյան, արձագանքելով ամերիկյան նախաձեռնությանը, նշել է, որ Մարդու իրավունքների խորհրդից Ռուսաստանին հեռացնելու գաղափարն աներևակայելի է և որևէ կերպ չի օգնի ռուս-ուկրաինական բանակցություններին:
«Մեր երկիրը փորձում են դուրս մղել աշխարհում ցանկացած բազմակողմ ձևաչափից, և այդ փորձերն աննախադեպ բնույթ են կրում։ Սակայն դա չի թեթևացնի, չի խրախուսի, չի պարզեցնի այն, ինչ տեղի է ունենում Ռուսաստանի և Ուկրաինայի միջև խաղաղության շուրջ բանակցություններում»,- ասել է ՌԴ ներկայացուցիչը:
Ավելի վաղ Նեբենզյան հայտարարել էր, որ Ռուսաստանը ՄԱԿ-ի Անվտանգության խորհրդին կներկայացնի փաստաթղթային փաստեր Բուչայի իրադրության մասին:
Azatutyun24
