Երեկ լրատվամիջոցներում տեղեկատվություն Էր տարածվել այն մասին, որ 44-օրյա պատերազմում զոհված զինծառայող Մխիթար Գալեյանի հայրը՝ Գարիկ Գալեյանը, հորեղբայրը՝ Արթուր Գալեյանը, և մեկ այ զոհված զինծառայողի մայր՝ Ազգուշ Մարտիրոսյանը, ծեծի են ենթարկել սպայի, նրա հասցեին հնչեցրել սեռական բնույթի հայհոյանքներ:

Այսօր արդեն ՀՀ քննչական կոմիտեն պաշտոնապես հաստատեց տեղեկությունը, ըստ որի՝ նախնական տվյալներով՝ 2022թ. մայիսի 17-ին՝ ժամը 14:05-ի սահմաններում, մի խումբ անձինք մուտք են գործել ՀՀ ՊՆ N զորամասի տարածք, որի ընթացքում չենթարկվելով զորամասի տարածքը լքելու՝ զորամասի հրամանատարի սպառազինության գծով տեղակալ, գնդապետի օրինական պահանջին՝ հայհոյել են, քաշքշել և բռնություն գործադրել նրա նկատմամբ՝ պլաստմասե շշով հարվածելով դեմքին:

«Նախաքննությունը շարունակվում է»,- մանրամասնել են Քննչական կոմիտեից:

Նշենք, որ համացանցում տեսանյութ է տարածվում, որտեղ ավելի վաղ Երևանի Ազատության հրապարակում, երբ զոհվածների մի քանի ծնողներ և հարազատներ այցելել էին հացադուլ հայտարարած 44-օրյա պատերազմի 2 մասնակիցներին տեսության, Գարիկ Գալեյանը լրատվամիջոցներից մեկի հետ զրույցում ասել է, որ պետք է գործող իշխանությունը պատժվի, հակառակ դեպքում իրենք տեռոր կիրականացնեն:

«Մենք արդեն ամեն օր մտածում ենք տեռորի մասին, ու չգիտենք՝ էտի որ դպրոցն ենք մտնելու, էսի ազգին եմ ասում, որ մանկապարտեզը, որ բուհը, որ Կառավարության շենքը»,- նշել է նա:

Լրագրողի դիտարկմանը, որ այս հայտարարություններից հետո կարող է քրեական հետապնդում իրականցվել, վերջինս արձագանքել է, որ չի վախենում քրեական հետապնդումից:

Նշենք, որ դեպքի առթիվ հարուցված քրեական գործի շրջանակներում Գարիկ Գալեյանը ձերբակալվել է, և ձեռք բերված բավարար ապացույցների համակցությամբ նրան մեղադրանք է առաջադրվել: Իսկ Արթուր Գալեյանի մասով ձերբակալելու որոշում է կայացվել, որը կատարման նպատակով ուղարկել է հետաքննության մարմնին: Ձեռնարկվում են անհրաժեշտ միջոցառումներ՝ նրան հայտնաբերելու և նախաքննական մարմնին ներկայացնելու ուղղությամբ:

Հավելենք, որ, ըստ փաստաբան Վահան Հովհաննիսյանի, Գարիկ Գալեյանի առողջական վիճակը վատացել է, և նրան տեղափոխել են հիվանդանոց: