ԱԺ նիստում Գնել Սանոսյանն անդրադարձավ Վերին Լարսում կուտակումներին և հայտնեց հայկական մեքենաների քանակը։

«Բոլորովին վերջերս էկոնոմիկայի նախարարը, իմ տեղակալը, ՊԵԿ աշխատակիցները եղել են Լարսում, ռուսական կողմի գործընկերների հետ բազմաթիվ քննարկումներ են ունեցել՝ վիճակը բարելավելու ուղղությամբ։ Պայմանավորվածություն ունենք. ՌԴ կառավարության համապատասխան որոշմամբ՝ լրացուցիչ կետ կտեղադրվի այսօր գործող մաքսակետից քիչ հեռավորության վրա, որն օրվա ընթացքում 170-200 մեքենա կարող է սպասարկել, որոշակի արտոնություն կլինի ԵԱՏՄ երկրների համար։ Արտոնությունը շատ ավելի մեծ է ԵԱՏՄ երկրների համար, բայց այնտեղ մեկ հերթի որոշակի խնդիր կա։

Մեքենաների քանակը բավականին մեղմվել է»,- ասաց Սանոսյանը։

Նա նշեց, որ այս պահին 400-500 հայկական մեքենա կա այնտեղ։

«Մենք խնդիր ունեինք ժամանակին նաև Ռուսաստանից Վրաստան անցնելու ուղղությամբ, որտեղ արդեն գրեթե խնդիր չկա։ Լավագույն դեպքում մեկ օր են այնտեղ մնում մեքենաները»,- ասաց նա։