Azatutyun24
Իրանի արտաքին գործերի նախարար Աբբաս Արաղչին հայտարարել է Վաշինգտոնի հետ անուղղակի բանակցություններ վարելու հնարավորության մասին և հավելել, որ Իրանը հաղորդագրություններ կփոխանցի ԱՄՆ-ին միջնորդների միջոցով, հաղորդում է IRNA գործակալությունը։
«Վաշինգտոնի հետ ուղղակի բանակցություններ չեն լինի այնքան ժամանակ, քանի դեռ Միացյալ Նահանգները «չի փոխել իր մոտեցումն Իրանի Իսլամական Հանրապետության նկատմամբ»,- նշել է նախարարը։
«Այս հարցում մեր դիրքորոշումը լիովին պարզ է։ Իրանը առավելագույն ճնշման քաղաքականության, հնչեցվող սպառնալիքների ներքո ԱՄՆ-ի հետ ուղղակի բանակցություններ չի վարի մինչև այն պահը, երբ Իրանի և Իրանի ժողովրդի նկատմամբ հակառակ կողմի մոտեցման մեջ փոփոխություն տեղի չունենա: Մենք ուղղակի բանակցությունների չենք գնա ամերիկյան կողմի հետ, բայց անուղղակի բանակցությունների ճանապարհը բաց է»,- ասել է նա SNN հեռուստաալիքի եթերում։
Արաղչին նաև վստահություն է հայտնել, որ «ոչ մեկի մտքով չի անցնի հարձակվել Իրանի վրա, քանի որ պարզ է, թե ինչ հետևանքներ կլինեն»։ Միաժամանակ նա ընդգծել է, որ Իրանն «ամբողջությամբ պատրաստ է»։
Անցյալ շաբաթ միջազգային լրատվամիջոցները, հղում անելով իրենց աղբյուրներին, հաղորդել են, որ ԱՄՆ նախագահ Դոնալդ Թրամփը Իրանի Իսլամական Հանրապետության ղեկավար այաթոլլա Ալի Խամենեիին ուղղված նամակում պահանջել է երկու ամսում հասնել իրանական միջուկային ծրագրի շուրջ նոր համաձայնության:
Azatutyun24
