Azatutyun24
ԱՄՆ նախագահ Դոնալդ Թրամփի վարչակազմը հանգիստ քննարկում և խորհրդակցում է արտաքին փորձագետների հետ՝ դիտարկելով Հյուսիսային Կորեայի հետ երկխոսության վերսկսման հնարավոր տարբերակները, հաղորդում է Axios-ը՝ հղում անելով ԱՄՆ բարձրաստիճան պաշտոնյաներին։
Հյուսիսային Կորեան մտահոգիչ միջուկային առաջընթաց է գրանցել այն բանից հետո, երբ նախագահ Թրամփը և Կիմ Չեն Ընը երկու դրամատիկ, բայց, ի վերջո, ձախողված հանդիպում ունեցան։
Ինչպես նշում է լրատվամիջոցը, Թրամփը պարզ հասկացրել է, որ կցանկանար վերսկսել բանակցությունները Կիմ Չեն Ընի հետ, հնարավոր է՝ դեմ առ դեմ, և նրա ազգային անվտանգության թիմը պատրաստվում է նման սցենարի։
Սակայն, ինչպես պնդում է Axios-ը, Հյուսիսային Կորեան ներկայումս համեմատաբար ցածր տեղ է զբաղեցնում Թրամփի առաջնահերթությունների ցանկում, սակայն աշխարհի նորագույն միջուկային տերությունը հազվադեպ է երկար ժամանակով դուրս մնում միջազգային օրակարգից։
«Մենք ներգրավում ենք գործակալություններին, որպեսզի հասկանանք, թե որտեղ են այսօր գտնվում հյուսիսկորեացիները։ Վերջին չորս տարիների ընթացքում շատ բան է փոխվել։ Մենք գնահատում, ախտորոշում և քննարկում ենք հավանական հնարավորությունները, այդ թվում՝ փոխգործակցությունը», — ասել է ԱՄՆ բարձրաստիճան պաշտոնյան։
«Վերլուծական կենտրոնների փորձագետների, ԱՄՆ ներկա և նախկին պաշտոնյաների մասնակցությամբ փակ դռների հետևում քննարկումները ենթադրում են, որ Թրամփի վարչակազմը դիտարկում է Թրամփ-Կիմ ևս մեկ հանդիպման տարբեր սցենարները», — ասել է Բրուքինգսի ինստիտուտի ավագ գիտաշխատող Էնդրյու Յեոն։
Յեոն հավելել է, որ վերջին վեց ամսվա ընթացքում Կիմ Չեն Ընի մասին Թրամփի բազմաթիվ դրական հայտարարությունները ցույց են տալիս, որ նա հետաքրքրված է այս ուղղությամբ։ ԱՄՆ նախկին բարձրաստիճան պաշտոնյան ասել է, որ վարչակազմի անդամները զբաղվել են «նախնական պլանավորմամբ»՝ գիտակցելով, որ Կիմի ընդամենը «մեկ գունագեղ նամակը» կարող է բավարար լինել Թրամփի ուշադրությունը գրավելու համար։
