Թուրքիայի նախագահ Ռեջեփ Թայիփ Էրդողանը կիրակի օրը վերահաստատել է Կիպրոսում երկու պետությունների ստեղծման լուծմանն իր երկրի աջակցությունը՝ միջազգային հանրությանը կոչ անելով համակերպվել միջերկրածովյան կղզու առկա բաժանման հետ, հայտնում է AFP-ն։

Կիպրոսը բաժանված է 1974 թվականից, երբ թուրքական ներխուժմանը հաջորդեց Նիկոսիայում տեղի ունեցած պետական հեղաշրջումը, որին աջակցում էր Հունաստանի այն ժամանակվա ռազմական խունտան։

Այսպես կոչված «Հյուսիսային Կիպրոսի Թուրքական Հանրապետությունը», որը հռչակվել է 1983 թվականին, ճանաչում է միայն Անկարան։

«Մենք լիովին աջակցում ենք երկու պետությունների համակեցության վրա հիմնված հայեցակարգին»,- հայտարարել է Էրդողանը Կիպրոսի օկուպացված հատված կատարած այցի ժամանակ, որը նվիրված էր կղզի թուրքական զորքերի ներխուժման 51-րդ տարելիցին։

«Ժամանակն է, որ միջազգային հանրությունը համակերպվի տեղում առկա իրողությունների հետ»,- ասել է Էրդողանը։

Թուրքիայի ղեկավարի այցը տեղի է ունեցել մի քանի օր անց այն բանից հետո, երբ ՄԱԿ-ի գլխավոր քարտուղար Անտոնիու Գուտերեշը հայտարարել է, որ Նյու Յորքում կազմակերպության կենտրոնակայանում Կիպրոսի մրցակից առաջնորդների միջև հանդիպումները «կառուցողական» են եղել՝ չնայած կղզու անցակետերի վերաբերյալ հարցերը չեն լուծվել։

Էրդողանը կիրակի օրը կոչ է արել «վերջ տալ ՀԿԹՀ-ի մեկուսացմանը»։

«ՀԿԹՀ-ի հետ պետք է հաստատվեն դիվանագիտական, քաղաքական և տնտեսական հարաբերություններ, և վերջապես պետք է վերջ դրվի այն անարդարությանը, որին տասնամյակներ շարունակ բախվում են կիպրոսցի թուրքերը»,- ասել է նա։

Խաղաղ բանակցությունների վերջին խոշոր փուլը ձախողվել է 2017 թվականի հուլիսին Շվեյցարիայի Կրան-Մոնտանա քաղաքում։

Էրդողանի հայտարարությունից կարճ ժամանակ առաջ Հունաստանի վարչապետ Կիրիակոս Միցոտակիսը միանգամայն հակադիր կոչ էր արել․ բանակցություններ անցկացնել կղզու վերամիավորման շուրջ։