Capital One Financial բանկը ուրբաթ օրը դատարանում հանդես է եկել Trump Organization-ի հայցի դեմ՝ հայտարարելով, որ ընկերության բանկային հաշիվները փակելու որոշումը կայացվել է փողերի լվացման դեմ պայքարի մասնագետների ստուգումից հետո, հաղորդում է Reuters-ը։

Սա առաջին դեպքն է, երբ բանկը պաշտոնապես կապել է Դոնալդ Թրամփի ընտանիքի բիզնեսի սպասարկման դադարեցումը ֆինանսական վերահսկողության ընթացակարգերին առնչվող հարցերի հետ։ Capital One-ը ձգտում է հասնել հայցի մերժմանը՝ վիճարկելով Trump Organization-ի պնդումները, թե հաշիվները փակվել են քաղաքական կամ կրոնական պատճառներով։

Միևնույն ժամանակ բանկը շեշտել է, որ երբեք ուղղակիորեն չի մեղադրել Trump Organization-ին փողերի լվացման մեջ։ Դատական փաստաթղթում նշվում է, որ հաշիվների փակումը դարձել է «մի քանի ամիս տևած վերլուծության և Capital One-ի փողերի լվացման դեմ պայքարի թիմի մանրակրկիտ ստուգման արդյունք՝ բանկի քաղաքականության և կարգավորող պահանջների համաձայն»։

Capital One-ը հայտնել է Trump Organization-ի հետ կապված ավելի քան 300 հաշիվ փակելու մտադրության մասին 2021 թվականի մարտին։

2025 թվականի մարտին Trump Organization-ը և ԱՄՆ նախագահի որդին՝ Էրիկ Թրամփը, հայց են ներկայացրել Ֆլորիդայի դաշնային դատարան՝ հայտարարելով, որ բանկը դադարեցրել է սպասարկումը Capital One-ի «գաղափարական հայացքների» և 2021 թվականի հունվարի 6-ին Կապիտոլիումի անկարգություններից հետո քաղաքական իրավիճակից օգտվելու ձգտման պատճառով։

Ուրբաթ օրվա հայտարարության մեջ բանկը այս մեղադրանքներն անվանել է անհիմն և նշել, որ դրանք հիմնված են փաստաթղթերից վերցված առանձին մեջբերումների վրա, որոնք դուրս են բերված ընդհանուր համատեքստից։ Capital One-ի վարկածով՝ իր կողմից հայտնաբերված գործարքների առանձնահատկությունները վերաբերում էին այնպիսի տրանսակցիաների տեսակների, որոնք ԱՄՆ կարգավորող մարմինները խորհուրդ են տալիս ստուգել փողերի լվացման դեմ պայքարի օրենսդրության շրջանակում։

Քաղաքական դրդապատճառներով բանկային սպասարկման սահմանափակման թեման դարձել է Թրամփի երկրորդ նախագահական ժամկետի ընթացքում վիճահարույց հարցերից մեկը։ 2025 թվականի օգոստոսին նա ստորագրել է հրամանագիր, որն, իր խոսքով, արգելում է բանկային ծառայությունների խտրական դադարեցումը։

Ավելի վաղ Թրամփը նաև հայց էր ներկայացրել JPMorgan Chase-ի դեմ՝ նմանատիպ հիմքերով։ Դեռևս 2019 թվականին՝ իր առաջին նախագահական ժամկետի ընթացքում, նա փորձել էր դատարանի միջոցով խոչընդոտել Capital One-ին և Deutsche Bank-ին իր ֆինանսական փաստաթղթերը Կոնգրեսին փոխանցելուն՝ դեմոկրատների նախաձեռնած հետաքննության շրջանակում։