Մալաթիա-Սեբաստիա վարչական շրջանի Հարավ-արևմտյան թաղամասի բնակիչները բողոքում են ընդդեմ Հյուսիս-հարավ ավտոճանապարհի կառուցման, քանի որ որոշ հատված անցնելու է հենց բազմաբնակարան շենքերի մուտքերի կողքով:

«Արմենպրես»—ի հաղորդմամբ՝ այս պահին Հարավ-արևմտյան թաղամասում, որտեղով պետք է անցնի Հյուսիս-հարավ ճանապարհի մի մասը, շինարարական աշխատանքներ են իրականացվում:

Երևանի քաղաքապետարանն արդեն իսկ գործարկել է տեխնիկան և ապամոնտաժվում են ավտոտնակները:

Բնակիչները բողոքում են, որ ավտոճանապարհն անցնելու է անմիջապես իրենց բազմաբնակարան  շենքերի մուտքերի մոտով, ինչը վտանգավոր է:

«Անվտանգությունն ընդհանրապես ապահովված չէ, այս պահին մենք ունենք 3 մուտք և 3 ելք, սակայն քաղաքապետարանից մեզ առաջարկում են 4 մուտք և 1 ելք ամբողջ բազմաբնակարան շենքի համար: Այս տարբերակն ընդհանրապես հարմար չէ: Ճանապարհի կառուցմանը մենք դեմ չենք, ուղղակի այն անցնելու է բնակելի տարածքի անմիջապես հարևանությամբ: Այս պարագայում էլ ցանկացած բնակիչ կարող է դուրս գալ շենքից և վրաերթի ենթարկվել: Մենք դեմ չենք, որ ավտոտնակները քանդվում են, ուղղակի պետք է սկզբում լուծում տան այս խնդրին, հետո շարունակեն աշխատանքներ իրականացնել»,- ասաց բնակիչներից մեկը:

Երևանի քաղաքապետի մամուլի խոսնակ Հակոբ Կարապետյանը նշեց, որ մինչ ավտոտնակների ապամոնտաժումը համայնքը փոխհատուցել է սեփականատերերին:

«Այս պահին, քանդվում են փաստացի համայնքի սեփականությունը հանդիսացող ավտոտնակները: Բնակիչները մտահոգվում են իրենց կյանքի պայմանների վատթարացման և անվտանգության համար, քանի որ ճանապարհն անցնելու է շենքերի մուտքերի անմիջապես հարևանությամբ: Խնդիրը նոր չէ, և ամիսներ առաջ էլ քաղաքապետարանում Երևանի գլխավոր ճարտարապետի հետ հանդիպել են բնակիչները, քննարկումներ են եղել՝ օպտիմալ տարբերակները գտնելու համար: Քննարկումների արդյունքում նախագծերում կատարվել են փոփոխություններ, որոնք գոհացրել են բնակիչների մի մասին, իսկ մյուս մասն իր անհամաձայնությունն է հայտնում այս առիթով: Կարծում եմ, քննարկումները դեռ կշարունակվեն, և կգտնենք համայնքի ու բնակիչների համար լավագույն տարբերակը»,- նշեց Կարապետյանը: