Azatutyun24
ՀՀ առողջապահության նախարար Արսեն Թորոսյանը մանրամասներ է ներկայացրել Ստեփանակերտ իր այցից: Նրա խոսքով՝ ադրբեջանական հրետակոծության հետևանքով ունենք զոհեր ու վիրավորներ ինչպես զինվորական անձնակազմի, այնպես էլ քաղաքացիական բնակչության շրջանում:
«Դա իմ երրորդ այցն էր: Ուզում եմ համեմատել առաջին և երրորդ օրերի իրավիճակը: Իրավիճակն այնպիսին էր, որ Ստեփանակերտն ամբողջությամբ գտնվում էր ռմբակոծության տակ, և որևէ տարբերություն չկար հրթիռների թիրախների միջև:
Բժշկական ծառայության առումով էլ մեր գործընկերները փաստացի երբեմն զրկված են լինում կարիքի մեջ գտնվող մարդկանց օգնություն ցույց տալու հնարավորությունից, որովհետև Ստեփանակերտն ու այլ քաղաքներ գտնվում են օդային տագնապի և ռմբակոծության տակ, և նույնիսկ շտապօգնության մեքենաները չեն կարողանում օգնություն ցույց տալ նրանց, ովքեր դրա կարիքն ունեն»,- տեղեկացրեց նախարարը:
Թորոսյանը նշեց, որ ինքն անձամբ է ականատես եղել Ստեփանակերտի «Հանրապետական» հիվանդանոցին շատ մոտ հրթիռային հարվածին: Նրա խոսքով՝ մեծ հավանականությամբ, հրթիռը կարող էր հարվածել հենց հիվանդանոցին:
«Չնայած այս ամենին՝ մենք մեր հայրենակիցների կողքին ուժեղ կանգնած ենք, ամբողջ բժշկական հանրույթը Հայաստանի ու Արցախի իր մյուս գործերը թողած՝ զբաղվում է մեր վիրավորների բուժմամբ և տարհանմամբ: Մենք մինչև վերջ պայքարելու ենք և հաղթելու ենք»,- նշեց Թորոսյանը:
Azatutyun24
