ՀՀ Սահմանադրության 151-րդ հոդվածի համաձայն՝ կառավարությունը ձևավորումից հետո՝ 20-օրյա ժամկետում, պետք է ԱԺ հաստատմանը ներկայացնի կառավարության գործունեության ծրագիրը: Կառավարության նիստի ընթացքում վարչապետ Նիկոլ Փաշինյանը ներկայացրեց կառավարության 2021-2026 թվականների գործունեության ծրագիրը:

«Ծրագիրը բաղկացած է 6 բաժինից՝ անվտանգություն և արտաքին քաղաքականություն, տնտեսություն, ենթակառուցվածքների զարգացում, մարդկային կապիտալի զարգացում, իրավունք և արդարադատություն, ինստիտուցիոնալ զարգացում: Մեր հիմնական քաղաքական ուղերձը, որ ներառում է այս ծրագիրը, կարծում եմ, ընդգրկված է ծրագրի նախաբանի մեջ»,- ասաց վարչապետը:

Նախաբանի տեքստը մեջբերելով՝ Նիկոլ Փաշինյանն ասաց.

«ՀՀ կառավարության ծրագիրը հիմնված է 2021 թվականի հունիսի 20-ի խորհրդարանական արտահերթ ընտրություններում «Քաղաքացիական պայմանագիր» կուսակցության նախընտրական ծրագրի, քարոզարշավի ընթացքում ՀՀ քաղաքացիների առաջ ստանձնած պարտավորությունների, նրանց տված նախընտրական խոստումների, Հայաստանի վերափոխման մինչև 2050 թվականի ռազմավարության վրա»: