Երեկ՝ դեկտեմբերի 28-ին, Գյումրիում տեղի ունեցած աղմկահարույց սպանությունից հետո Գյումրիում չէին դադարում խոսակցությունները, թե սպանությունը չի բացահայտվի ու կարճ ժամանակ անց այն կմատնվի մոռացության իսկ հանցագործը կամ հանցագործները  ազատ կշրջեն: Սպանությունից կարճ ժամանակ անց,  ՀՀ ոստիկանության պետ,  ոստիկանության գեներալ-մայոր Վահե Ղազարյանի  կարգադրությամբ, ստեղծվեցին օպերատիվ-հետախուզական և քննչական  խմբեր ու փորձառու ոստիկաններն  ու քննիչները անցան գործի, մի քանի վարկածների ուղղությամբ կատարվեցին աշխատանքներ և,  ի վերջո,  ապացուցեցին, թե ում օրն է  40 օր կամ, որ  չբացահայտվող հանցագործություններ չկան: 

Երեկ Գյումրիում աղմկահարույց սպանության կասկածանքով Երևան քաղաքից  ոստիկանության Կումայրիի բաժին են բերման ենթարկել Երևանի բնակիչ, 50-ամյա Գևորգ Մ.-ին: Կայքի տեղեկություններով՝ նա կասկածվում է  Գյումրի քաղաքի բնակիչ,  63-ամյա Անահիտ Իսկանդարյանին  սպանելու և նրա պայուսակն ու բջջային հետախոսը գողանալու մեջ: Վերջինս ոստիկանության Կումայրիի բաժնից ներկայացվել է ՀՀ  քննչական կոմիտեի Շիրակի մարզային քննչական վարչություն, որտեղ էլ քննիչի որոշմամբ ձերբակալվել է: Նրա նկատմամբ հարուցվել է քրեական գործ՝ ՀՀ քր օր-ի 104 հոդվածի 2-րդ մասի 8-րդ կետի հատկանիշներով: Նա խոստովանել է, որ ինքն է սպանությունը կատարել,  իսկ դրամապանակն ու հեռախոսը այրել է Գյումրու Երևանյան  խճուղու վերջնամասում, իսկ հանցագործության  գործիք դանակը նետել է Գյումրի-Երևան ավտոճանապարհին: