Հրդեհ է բռնկվել Մոսկվայի հարավում գտնվող բնակելի թաղամասի 16-հարկանի շենքի առաջին հարկում սարքավորված հանրակացարանում։ Արտակարգ իրավիճակների նախարարության տվյալներով՝ զոհվել է ութ մարդ։ Ըստ ԶԼՄ-ների՝ զոհերը աշխատանքային միգրանտներ են։ Հրշեջ-փրկարարները նախօրեին՝ ժամը 23.47-ին, ահազանգ են ստացել առաջին հարկում գտնվող Ալմա-Ատինսկայա փողոցի թիվ 7 տան 2 շենքի հանրակացարանում բռնկված հրդեհի մասին։ Արդեն ժամը 00:47-ին հրդեհը մարվել է, դրա մակերեսը կազմել է 150 քմ, հայտնել են ՌԴ ԱԻՆ մամուլի ծառայությունից։ Այրված հանրակացարանում ութ մարդ է հայտնաբերվել՝ առանց կյանքի նշանների, չորս հոգի հոսպիտալացվել են։ Բոլոր մահացածները միգրանտներ են, նրանց քաղաքացիությունը հաստատվում է, ՏԱՍՍ-ին հայտնել է անանուն աղբյուրը։ «Կոմերսանտի» զրուցակիցը պատմել է, որ հոսթելի հյուրերը հիմնականում եղել են մոտակա «Մոսկվա» առևտրա-տոնավաճառ համալիրի (Լյուբլինոյի շրջանում) և «Այգեգործ» շուկայի (Կապոտնյա) բանվորներն ու վաճառողները։