Երեկ՝ 2021 թվականի հունիսի 20-ին, Հայաստանում անցկացվում էին Ազգային ժողովի արտահերթ ընտրությունները։ Մեր աշխատակիցներից մեկը տեղեկացավ, որ թիվ 17 ընտրատեղամասում արձանագրվել է հերթական խախտումը։ Ըստ հաղորդագրության՝ «Պատիվ ունեմ» դաշինքի ներկայացուցիչը թեժ գծին ահազանգել է իշխող Քաղաքացիական պայմանագիր կուսակցության ներկայացուցիչների և նրանց աջակիցների ապօրինի գործողությունների մասին։

Մասնավորապես, ընտրատեղամասում նկատվել է միկրոավտոբուսներով բերված ընտրողների զանգվածային հոսք, որոնց ուղեկցում էին երիտասարդներ։ Ըստ վկայությունների՝ վերջիններս ուղեկցել են քաղաքացիներին նույնիսկ մինչև քվեախցիկ, խախտելով քվեարկության գաղտնիության սկզբունքը և փաստացի վերահսկելով նրանց քվեարկության ընթացքը՝ ի նպաստ ՔՊ-ի։

«Պատիվ ունեմ» խմբակցության վստահված անձ Արտաշես Սարիբեկյանը, տեսնելով տեղում ընթացող այս բացահայտ խախտումները, փորձել է միջամտել՝ կանխելու համար ուղղեկցողների անօրինական ներկայությունը ընտրական տարածքում։ Սակայն ոստիկանության աշխատակիցները ոչ միայն չաջակցեցին օրինական ընթացքին, այլ նաև Սարիբեկյանին հեռացրել են ընտրատեղամասից՝ փաստացի սատարելով խախտող կողմին։

Նշենք, որ սա մեկուսացված դեպք չէ։ Նմանատիպ ահազանգեր շարունակվում են տարբեր տեղամասերից։ ՔՊ ներկայացուցիչները, ինչպես միշտ, հերքում են բոլոր մեղադրանքները՝ միևնույն ժամանակ շարունակելով իրենց թավշյա հեղափոխության կարգախոսներով քողարկել իրականությունը։ Սակայն իրականությունն այն է, որ այս ընտրությունները ևս ուղեկցվում են բացահայտ ճնշումներով, կազմակերպված խախտումներով և պետական համակարգի բացարձակ անգործությամբ։

Կոչ ենք անում դիտորդներին, լրագրողներին և իրավապաշտպաններին ուշադրությամբ հետևել ընտրական գործընթացներին և արձագանքել ցանկացած անօրինականության։