Ուկրաինայի զինված ուժերի անօդաչու սարքերը հարվածել են Wildberries ընկերության պահեստին Սամարայի մարզում, Telegram-ում հայտնել է տարածաշրջանի նահանգապետ Վյաչեսլավ Ֆեդորիշչևը։

Նա նշել է, որ դեպքի վայրում աշխատում են արտակարգ ծառայությունները։ Wildberries & Russ-ի մամուլի ծառայությունը հաստատել է, որ հարձակման հետևանքով պահեստի տարածքում հրդեհ է բռնկվել։ Նախնական տվյալներով ոչ ոք չի տուժել։

Ընկերությունը հայտարարել է, որ լոգիստիկ գործընթացներն օպերատիվորեն վերակազմակերպվել են․ մատակարարումների ընդունումն ու պատվերների առաքումը շարունակվում են այլ օբյեկտների միջոցով։

Ավելի վաղ՝ հուլիսի 18-ին, Ուկրաինայի զինված ուժերն առաջին անգամ հարվածներ էին հասցրել Wildberries-ի պահեստներին՝ Մոսկվայի մարզի Էլեկտրոստալում և Տամբովի մարզի Կոտովսկ քաղաքում։ Հետագա հարձակումներից հետո, ինչպես հայտնել էր ընկերությունը, շարքից դուրս էր բերվել լոգիստիկ հզորությունների առնվազն 8%-ը, ինչը կազմում է մոտ 444 հազար քառակուսի մետր, տեղեկացնում է «Коммерсантъ»-ը։