Հունիսի լույս 13-ի գիշերը ոստիկանության Արաբկիրի բաժնի քրեական հետախույզները և անչափահասների գործերով ծառայողները վարչական շրջանում շրջիկ ծառայություն իրականացնելիս ապօրինի թմրաշրջանառության վերաբերյալ օպերատիվ տեղեկություններ ստացան ու, մեքենայով հանդերձ, բաժին բերման ենթարկեցին Երևանի բնակիչ 26-ամյա մի երիտասարդի՝ հաղորդում են ոստիկանության մամուլի ծառայությունից։ 

«Մերսեդեսի» զննությամբ հայտնաբերվել է ապակե և պլաստմասսայե 15 տարա՝ լցված մարիխուանայի նմանվող զանգվածներով, որոնց ընդհանուր քաշը գերազանցել է 230 գրամը։ Բերման ենթարկվածի հայտնածով` տարաներում թմրամիջոց է եղել։ 

Հետագա միջոցառումներով Արաբկիրի ոստիկանները փաստական տվյալներ են ձեռք բերել, որ բերման ենթարկվածը փորձել է «Տելեգրամ» բջջային հավելվածի միջոցով թմրամիջոց իրացնել տարբեր անձանց, ուստի մարիխուանայով լցված նմանատիպ տարաներ է թողել Արաբկիր վարչական շրջանի տարբեր հատվածներում։ Այդ տարաները ևս հայտնաբերվել են։ Դրանց ընդհանուր քաշն էլ գերազանցել է 100 գրամը։ 

Դեպքի առթիվ քրեական գործ է հարուցվել։  26-ամյա երիտասարդը ձերբակալվել է։  Նշանակվել են մի շարք փորձաքննություններ։ Հանգամանքները պարզվում են։