Azatutyun24
Նիդերլանդների խորհրդարանի անդամները միացել են Հաագայում հայ համայնքի ներկայացուցիչների բողոքի ակցիային, որի մասնակիցները պահանջում են ազատ արձակել հայ ռազմագերիներին: Այս մասին հայտարարել է Նիդերլանդներում հայկական կազմակերպությունների ֆեդերացիան (FAON):
Ցուցարարները կոչ են արել դադարեցնել Հայաստանի դեմ Ադրբեջանի ռազմական ագրեսիան և քայլեր ձեռնարկել Բաքվի դեմ, որը Եվրո-2020-ը հյուրընկալող քաղաքներից մեկն է:
Ֆեդերացիան նշել է, որ բողոքի ցույցի ժամանակ կազմակերպվել է նաև Ադրբեջանի կողմից հայկական մշակութային ժառանգության ոչնչացումն ու պղծումը պատկերող լուսանկարների ցուցահանդես:
Նիդերլանդների ցույցերն ամբողջ աշխարհի հայերի կողմից կազմակերպված համաշխարհային լուռ բողոքի ակցիաների մի մասն է, որի մասնակիցները պահանջում են ազատ արձակել բոլոր հայ ռազմագերիներին ու պահվող անձանց, ինչպես նաև ադրբեջանական զորքերը դուրս բերել Սյունիքի մարզից:
Azatutyun24
