Հունվարի  28-ին  DISQO-ն հայտարարեց ԱՏՁՄ-ի «Բանակից՝ ՏՏ ոլորտ» ծրագրով արցախյան պատերազմի մասնակիցների համար անվճար դասընթաց մեկնարկելու մասին։ Գրանցման հայտն արդեն բաց է և դիմումներն ընդունվելու են մինչև փետրվարի 27-ը ներառյալ։ 

Դասընթացի ծրագիրը մշակել է DISQO-ի մասնագիտական թիմը և միտված է պատրաստելու որակի ապահովման սկսնակ մասնագետներ։ Այն կմեկնարկի մարտից, կտևի 2 ամիս, և կանցկացվի շաբաթական 2-3 անգամ՝ թե լսարանային և թե առցանց ձևաչափով՝ հնարավորություն տալով ընդգրկել մասնակիցներ նաև մարզերից։ 

Սա DISQO-ի երրորդ դասընթացն է պատերազմի մասնակիցների համար։ Ընկերության հայաստանյան գրասենյակի ղեկավար Թանիա Սահակյանը նշում է. «2021-ին իրականացրած 2 դասընթացների արդյունքում 27-ը հաջողությամբ ավարտեցին կրթական ծրագիրը, իսկ նրանցից երկուսն այժմ փորձաշրջան են անցնում մեր ընկերությունում։ Ավելին՝ մյուս շրջանավարտները ևս ստացել են աշխատանքի և փորձաշրջանի հնարավորություններ այլ տեխնոլոգիական ընկերությունների կողմից։ Լիահույս ենք, որ այս անգամ էլ դրական արդյունքներ կգրանցենք»։

ԱՏՁՄ կրթական ծրագրերի տնօրեն Շամամ Գևորգյանը ընդգծում է․  «Մեզ համար կարևորագույն պատասխանատվություն է ՏՏ ոլորտում գործունեություն վարելու նպատակով հնարավորություններ ստեղծել պատերազմների հետևանքով տուժած խմբերի համար։ Այդ առաքելությամբ ԱՏՁՄ-ն DISQO-ի հետ միասին նախաձեռնում է հերթական վերապատրաստումների շարքը, որը վստահաբար դրականորեն կանդրադառնա մասնակիցների կյանքի ուղղու վրա»։ 

DISQO-ն արդեն 3 տարի է շարունակաբար ընդլայնում է թիմը Հայաստանում։ 2021 թվականին ընկերությունը կրթական արշավ սկսեց՝ համագործակցելով ոչ միայն ԱՏՁՄ-ի, այլև այլ կրթական կենտրոնների հետ՝ Armenian Code Academy, Learning Mission, Գյումրու տեղեկատվական տեխնոլոգիաների կենտրոն։ Արդյունքում 150-ից ավելի ուսանողներ վերապատրաստվեցին և 25 փորձնակներ համալրեցին ընկերության թիմը։ Այժմ էլ ընկերությունը շարունակում է ընդլայնվել նոր աշխատատեղերով և վերապատրաստել նոր կադրերի թե՛ թիմի, և թե՛ Հայաստանի տեխնոլոգիական համայնքի համար։ 

starthub-am.cdn.ampproject.org