Ուկրաինայում պատերազմն ավարտելու վերաբերյալ խաղաղ բանակցությունները պետք է ստվերում լինեն, տեղեկացրել է ՊՆ ՀԳՎ պետ Կիրիլ Բուդանովը «РБК-Украина»-ի թղթակցի հետ զրույցում՝ երկրորդ ռազմական աղոթք-նախաճաշի շրջանակում։

Աբու Դաբիում գաղտնի բանակցությունների մասին տեղեկությունը հաստատելու խնդրանքին նա պատասխանել է, որ ցանկացած զգայուն գործընթաց լռություն է պահանջում։

«Բոլոր բանակցությունները պետք է ստվերում լինեն, այսպես ասենք։ Այլապես դրանք հաջող չեն լինի։ Ուզենք, թե չուզենք՝ մենք կարող ենք դրանք պարզապես խափանել։ Ուստի սպասեք»,- նշել է Բուդանովը։

Ինչպես նշել է «РБК-Украина»-ն, արեւմտյան լրատվամիջոցների տվյալներով՝ ԱՄՆ ներկայացուցիչ, բանակի գեներալ Դեն Դրիսքոլը Աբու Դաբիում փակ հանդիպումներ է ունեցել ռուսական կողմի հետ։

Շփումները նախապես համաձայնեցված էին դիվանագիտական ուղիներով եւ չեն ազդարարվել թեմայի բարձր զգայունության պատճառով։ Պենտագոնում հաստատել են բանակցությունների փաստը, բայց հրաժարվել են  բացահայտել դրանց ձեւաչափը կամ ռուսական պատվիրակության կազմը՝ միայն նշելով, որ «աշխատանքը զգայուն փուլում» է։

Ամերիկյան լրատվամիջոցները նշել են, որ Աբու Դաբիի հանդիպումը բանակցային գործընթացի շարունակությունն է, որը սկսվել է Ժնեւում։

Փաստաթղթի սկզբնական տարբերակը պարունակում էր 28 կետ, ներառյալ Ուկրաինայի չեզոք կարգավիճակի մասին կետը, տարածքային զիջումները եւ սպառազինությունների սահմանափակումը։ Կիեւի եւ որոշ եվրոպական մայրաքաղաքների քննադատությունից հետո պլանը կրճատվել է մինչեւ 19 կետի, սակայն առանցքային վիճելի հարցերը մնացել են։