Այսօր՝ մարտի 28-ին, խոշոր ավտովթար է տեղի ունեցել Երևանում: Ժամը 02:10-ի սահմաններում Տիգրան Մեծի պողոտայի և Գլինկա փողոցի խաչմերուկում բախվել են Երևանի բնակիչ, 23-ամյա Վահան Աղաբաբյանի վարած BMW մակնիշի  99 ՏT 799 համարանիշի  և Արարատի մարզի  Ջրաշեն գյուղի  բնակիչ, 36-ամյա Արամ Փիրումյանի վարած  Mercedes մակնիշի  88 PM 808 համարանիշի  ավտոմեքենաները:   Ինչպես հայտնում է ֆոտոլրագրող Գագիկ Շամշյանը, վթարի հետևանքով Mercedes–ի վարորդը ծայրահեղ ծանր ախտորոշմամբ տեղափոխվել է Թիվ 1  համալսարանական հիվանդանոց:  BMW-ի վարորդին և վիրավորին առաջինը օգնության են հասել շենքի բնակիչները, իսկ բախման հետևանքով էլ  BMW-ն դուրս է եկել ճանապարհի երթևեկելի գոտուց և մխրճվել ծաղկի սրահի մեջ, ինչի հետևանքով ծաղկի սրահին պատճառվել է խոշոր չափի նյութական վնաս:  Վթարի մասին Երևանի ճանապարհային ոստիկանության  օպերատիվ կառավարման կենտրոնի պատասխանատու հերթապահ Հակոբ Մասչյանը տեղեկությունը փոխանցել է ճանապարհային ոստիկանության ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունք, որտեղից ժամանել է   հերթապահ խումբը՝ բաժանմունքի պետ Գրգոր Ավետիսյանի, ավագ հետաքննիչ  Հովհաննես Սարգսյանի գլխավորությամբ:  Հետաքննչի հանձնարարականով ավտոմեքենաները տեղափոխվել են Երևանի ՃՈ պահպանվող հատուկ տարածք:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է  անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: 

 shamshyan.com