ՍԴ անդամները քիչ առաջ հանդես են եկել հայտարարությամբ:

«Ի պատասխան արդարադատության նախարարի հայտարարության՝ երկու օրից ՍԴ նախագահի լիազորությունների դադարեցման և ևս երեք դատավորի պաշտոնանկ արվելու վերաբերյալ, մենք՝ ներքոստորոգրյալներս, հայտնում ենք.

Սահմանադրության 167-րդ հոդվածի համաձայն՝ Սահմանադրական դատարանի լիազորությունները սահմանվում են Սահմանադրությամբ, իսկ կազմավորման և գործունեության կարգը` Սահմանադրությամբ և Սահմանադրական դատարանի մասին օրենքով:

«Սահմանադրական դատարանի մասին» սահմանադրական օրենքի 88-րդ հոդվածի 5-րդ մասը սահմանում է, որ մինչև 2015 թվականի փոփոխություններով Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահը և անդամները 12 տարվա ժամկետը լրանալուց հետո շարունակում են պաշտոնավարել մինչև իրենց լիազորությունների՝ 2005 թվականի փոփոխություններով Սահմանադրությամբ սահմանված ժամկետի ավարտը:

«Սահմանադրական դատարանի մասին» սահմանադրական օրենքի վերոնշյալ նորմը չի վիճարկվել Սահմանադրական դատարանում, չի ճանաչվել Սահմանադրությանը հակասող, ԱԺ կողմից չի ճանաչվել ուժը կորցրած, ուստի գործող է և ենթակա է կատարման:

Վերոգրյալից ելնելով՝ համապատասխան պաշտոնյաներին հորդորում ենք դուրս չգալ Սահմանադրությամբ և օրենքներով սահմանված լիազորությունների շրջանակից, իրավունքի ու օրինականության ծիրից»,- նշված է ՍԴ հայտարարության մեջ:

Հիշեցնենք՝ ՀՀ արդարադատության նախարար Ռուստամ Բադասյանը հայտարարել է, թե վաղվանից ուժի մեջ կմտնեն Սահմանադրության փոփոխությունները, և արդյունքում պետք է դադարեն ՍԴ նախագահի և ՍԴ երեք անդամի լիազորությունները:

Նախարար Բադասյանը պատասխանել էր հարցին՝ եթե ՍԴ անդամները չցանկանան լքել իրենց աշխատավայրը, հարկադրանքի միջոցներ կկիրառվե՞ն: «Չեմ կարծում՝ որևէ հարկադրանքի կարիք կա, Սահմանադրության փոփոխություններ են, ուժի մեջ կմտնեն վաղը։ Ցանկացած անձ պարտավոր է դրան ենթարկվել, չկա չենթարկվելու ձև»,- ասել էր նա։